Бидний тухай

Алсын хараа

Хүн амын 51 хувийг бүрдүүлж буй эмэгтэйчүүд улс төр, бизнесийн салбарт манлайлж, амжилтад хүрч, үзэл бодлоо чөлөөтэй илэрхийлэх замаар бодлого, соёлыг тодорхойлдог эрх тэгш нийгмийг бүтээхэд хувь нэмэр оруулах. 

Эрхэм зорилго

Room24 эмэгтэйчүүдийг баримттай, хэрэгцээтэй мэдээлэл, эх сурвалж, хэрэгслээр хангаж, ардчилалд тэгш оролцох боломжийг нь нэмэгдүүлэх эрхэм зорилготой. Бид эмэгтэйчүүдийн оролцоог дэмжиж, хамтдаа хөгжих, манлайлах, өөрчлөлт хийх орон зайг онлайн болон биет хэлбэрээр бүрдүүлэхийг зорьж байна. Үүнийг дараах арга замаар хэрэгжүүлнэ:

  • Улс төр, нийгмийн чухал бодлого, шийдвэр, үйл явдлууд эмэгтэйчүүдэд хэрхэн нөлөөлөх өнцгөөс харж, гүнзгий анализ хийсэн даацтай бүтээлүүд гаргах.

  • Улс төр, эдийн засаг, бизнес, мэдээллийн технологи зэрэг эрэгтэйчүүд давамгайлсан салбарт өөрчлөлт хийж буй эмэгтэй манлайлагчдын түүхийг хүүрнэх.

  • Эмэгтэйчүүд хоорондын бүтээлч хэлэлцүүлэг өрнүүлэх, коммюнити байгуулах боломж олгох дижитал платформыг бий болгож, үйл ажиллагаанууд зохион байгуулах.

  • Эмэгтэйчүүд үзэл бодлоо илэрхийлэх, олон нийтэд танигдах, амжилтад хүрэхэд шаардлагатай мэдлэг, мэдээллийг нийтлэл, сургалт, зөвлөх үйлчилгээгээрээ дамжуулан хүргэх. 

Room24 нэрний тухай

Алдарт зохиоч Виржиниа Вүүлф эмэгтэй хүн уран бүтээл туурвихад өөрийн гэсэн өрөө, мөнгө хоёр хэрэгтэйг онцолж, “Өөрийн гэсэн өрөө” нэртэй эссээ бичсэн байдаг. Монгол эмэгтэйчүүд өндөр боловсролтой, нийгмийн хөдөлгөгч хүч болж байгаа боловч улс төр, бизнесийн шийдвэр гаргах түвшинд тэдний оролцоо дутаж байгааг өөрчлөх зорилгоор бид Room24-ийг үүсгэн байгууллаа. 

Room2Thrive-Өөдлөн дэвжих өрөө

Эмэгтэй та өдөр, шөнийн алинд нь ч орж ирээд урам зориг, эрч хүчийг олж, өөрт тулгамдсан асуудлаа шийдвэрлэх арга замыг эрэлхийлж, өөрийгөө бүрэн дүүрэн нээж, аз жаргал, баяр баясгалантай амьдрахад хэрэгцээтэй мэдээлэл, мэдлэгийг олж авах өрөө байна.

Room4Change-Өөрчлөн шинэчлэх орон зай

Эрх тэгш, ардчилсан нийгмийг бүрдүүлэхэд шаардлагатай өөрчлөлт, нөлөөллийг хамтдаа хийх орон зай байна. 

Яагаад эмэгтэйчүүдэд зориулсан хэвлэл мэдээлэл хэрэгтэй гэж?

1925 оны гуравдугаар сард “Бүсгүйчүүдийн санал” сэтгүүл хэвлэгдсэнээр Монголын эмэгтэйчүүдийн хэвлэлийн түүх эхэлжээ. Ардчилалд шилжсэнээр чөлөөт хэвлэл бий болж, эдүгээ 500 орчим хэвлэл мэдээллийн байгууллага үйл ажиллагаа явуулж байна. Харамсалтай нь, эмэгтэйчүүдийн хэвлэл зах зээлийн шуурганд алга болов. Иймд, эмэгтэйчүүдийн хэвлэл үүссэний 100 жилийн тэмдэглэлт ойгоор бид Room24-ийг үүсгэн байгууллаа. 

Өрөөний үнэт зүйлс

Room24 нь Монголын хүн амын талаас илүүг бүрдүүлж буй, тэр дундаа ажил, амьдралын тэнцвэрийг олох, амжилтад хүрэх, ирээдүй хойч үедээ зориулан илүү эрх тэгш, илүү сайхан нийгмийг бий болгохын төлөө санаа сэтгэлээ чилээж буй эмэгтэйчүүдэд зориулсан мэдлэг, мэдээллийн найдвартай эх сурвалж, хөтөч, туслах байхыг зорьдог. Бидний үнэт зүйлс: 

  • Чанар. Баримтад тулгуурласан, судалгаатай, чанартай сэтгүүл зүйн бүтээлүүд гаргахаас гадна сургалт, зөвлөх үйлчилгээ, харилцааны бүх түвшинд төгс байдалд хүрэхийг эрмэлзэнэ. 

  • Хүний эрхэд суурилсан хандлага. Бид хүний эрх, шударга ёс, хүйсийн эрх тэгш байдлыг бүрэн хангасан нийгмийг бүрдүүлэхийн төлөө хичээн ажиллах бөгөөд ялгаварлан гадуурхлаас ангид байх, хэвшмэл ойлголтыг эвдэхэд үргэлж анхаарна. 

  • Бид хэрэглэгчдээ өөрсдийн коммюнити гэж хардаг. Мэдээлэл зөвхөн нэг чиглэлд урсах ёсгүй. Уншигч, гишүүдтэйгээ харилцах, тэдний хэрэгцээ, санал бодол, сэтгэл ханамжийг нэн тэргүүнд тавих нь бидний үйл ажиллагааны үндэс гэж үздэг.

  • Хамтын ажиллагаа, ил тод байдал. Бид үнэт зүйлс, зорилго нэгтэй хувь хүн, байгууллагуудтай хамтран ажиллахад үргэлж нээлттэй байх бөгөөд Room24-ийн үйл ажиллагааг хэн дэмжиж, санхүүжүүлж байгааг ил тод гаргаж байна.   

  • Хараат бус, бие даасан байдал. Улс төр, бизнесийн ашиг сонирхлоос ангид байж, редакцын зорилго, бодлогоо бие даасан байдлаар хэрэгжүүлнэ. Зар, сурталчилгаа болон санхүүгийн, оюуны дэмжлэгтэй гаргасан контентын эх сурвалжийг уншигчдад тодорхой харуулна.   

  • Хариуцлага. Амжилт, алдааныхаа төлөө бүрэн хариуцлага хүлээнэ. Мэдээж хүн алдаа гаргаж болохыг хүлээн зөвшөөрч, гаргасан алдаагаа цаг тухайд нь, үнэнч шударгаар залруулна.

  • Олон талт байдал ба хүртээмж. Тэгш боломжийг хангаж, хүн бүрд ээлтэй орчин бүрдүүлэхийг зорьж ажиллана.

51%

Монгол Улсын хүн амын 51 хувийг 1.8 сая эмэгтэй бүрдүүлж байна.

61%

Их дээд сургуулийн суралцагчдын 61 хувийг эмэгтэйчүүд бий болгож байна.

16.2%

Ажиллах хүчний оролцооны түвшин эрэгтэйчүүдийн хувьд 68.1 хувь байгаа бол эмэгтэйчүүдийнх 51.9 хувьтай байна. 2006 онд ижил түвшинд байсан энэ үзүүлэлтийн ялгаа 16.2 хувьд хүрсэн нь мэдлэг, боловсролтой ажиллах хүчнээ бүрэн дүүрэн ашиглаж чадахгүй байгааг илтгэнэ. 

21.5%

Эмэгтэйчүүдийн сарын дундаж цалин 1.6 сая төгрөг байгаа бол эрэгтэйчүүдийнх 2.1 сая төгрөг байгаа нь 21.5 хувиар өндөр үзүүлэлт юм. Цалингийн зөрүү жилээс жилд нэмэгдэж ирсэн бөгөөд дэлхийн дунджаас ч өндөр болжээ. 

30%

2023 оны байдлаар төрийн албан хаагчдын дийлэнх буюу 64 хувийг эмэгтэйчүүд эзэлж байгаа ч төрийн захиргааны тэргүүн түшмэлийн албан тушаалд ажиллаж буй нийт албан хаагчдын 30 хувийг л эмэгтэйчүүд бүрдүүлж байна.

273 минут

Монгол эмэгтэй өдөрт 273 минут буюу 4.5 орчим цагийг хөлсгүй хөдөлмөрт зарцуулж байгаа нь эрэгтэйчүүдтэй харьцуулахад хоёр дахин их байна.

¼

Хэвлэл мэдээллээр гарч байгаа дөрвөн хүн тутмын нэг нь л эмэгтэй. Ялангуяа улс төрийн мэдээллээр эмэгтэйчүүд бүр цөөн гарч байна. 

Товчхондоо, эмэгтэйчүүд үндсэн эрхээ эдэлж чадахгүй хэвээр байна. Тиймээс хүний эрхийг дээдэлсэн, эрх тэгш, ардчилсан нийгмийг бүрдүүлэх түүхийг Room24 эмэгтэйчүүдийн туршлага, үзэл бодлыг хүргэх замаар бичихийг зорьж байгаа юм. 

25%

Монгол Улс 1924 онд эмэгтэйчүүдийн сонгох, сонгогдох эрхийг хуульчилсан Азийн анхны улс болсон ч энэ амжилтаа бататгаж чадалгүй өдий хүрчээ. Өнөөдөр УИХ-ын гишүүдийн 25 хувийг эмэгтэйчүүд бүрдүүлж байгаа нь дэлхийн дунджаас доогуур үзүүлэлт юм. Мөн аймаг, нийслэлийн ИТХ-ын төлөөлөгчдийн 27.5, сум, дүүргийн ИТХ-ын төлөөлөгчдийн 28 хувийг л эмэгтэйчүүд бий болгожээ.

0

Монголд нэг ч эмэгтэй Ерөнхийлөгч байгаагүй.

⅓

Гурван эмэгтэй тутмын нэг нь бие махбодын, эсвэл бэлгийн хүчирхийлэлд өртөж байна.

Товчхондоо, эмэгтэйчүүд үндсэн эрхээ эдэлж чадахгүй хэвээр байна. Тиймээс хүний эрхийг дээдэлсэн, эрх тэгш, ардчилсан нийгмийг бүрдүүлэх түүхийг Room24 эмэгтэйчүүдийн туршлага, үзэл бодлыг хүргэх замаар бичихийг зорьж байгаа юм. 

Өрөөний хамт олон

ROOM24.mn мэдээллийн сайтыг хэвлэл мэдээллийн салбарт олон жил ажилласан туршлагатай мэргэжлийн сэтгүүлчид үүсгэн байгуулсан бөгөөд Монголд анх удаа төлөөллийн, мөн нөлөөллийн сэтгүүл зүйг хөгжүүлэхийг зорьж байна.

Үүсгэн байгуулагч, Хамтын ажиллагаа хариуцсан захирал

Надад хоёр далавч бий. Энэ бол иргэний нийгэм, хэвлэл мэдээлэл. Би үг хэлэх, үзэл бодлоо илэрхийлэх эрх чөлөөг бэхжүүлэх чиглэлээр, мөн хүний эрх, тэр дундаа охид, эмэгтэйчүүдийн эрхийн төлөө тууштай зогсож, ажилласаар ирсэн. 

Оюутан байхдаа хүн худалдаалах гэмт хэргийн эсрэг хэвлэл мэдээллийн аянд сайн дурын ажилтнаар оролцсон хэдхэн сар надад тэгш эрхийн төлөө ажиллах, орхигдсон нэгний дуу хоолой болох хэрэгтэйг ойлгуулсан юм. Эндээс би ирээдүйн Амартүвшингийн хүсэл, эрмэлзлийг олсон. Энэ аялал намайг Room24-ийг үүсгэн байгуулах санаачилгад хөтөлсөн билээ. 

2020, 2024 оны УИХ-ын сонгуулиар эмэгтэйчүүдийн улс төрийн оролцоо яагаад чухал болохыг олон нийтэд ойлгуулах, жендэрийн хэвшмэл ойлголтыг халах хэвлэл мэдээллийн кампанит ажлыг удирдсан. Тухайлбал, Хэвлэл мэдээллийн зөвлөлд төслийн менежерээр ажиллах хугацаандаа “Мэдрэмжтэй мэдээлье” нэгдлийг санаачлан байгуулсан нь хэвлэл мэдээллийн салбарт олон ургалч дуу хоолойг нэмэгдүүлэхэд үнэтэй хувь нэмэр оруулсан юм. Энэ хүрээнд НҮБ-ын Хөгжлийн хөтөлбөр, төрийн болон иргэний нийгмийн байгууллагууд, хэвлэл мэдээлэл болон сэтгүүлчидтэй нягт хамтран ажиллаж, коммюнити байгуулах туршлага хуримтлууллаа. 

Room24-ийн Хамтын ажиллагаа хариуцсан захирлын хувьд гишүүдийнхээ хэрэгцээ шаардлага, хүсэл эрмэлзлийг нэгдүгээрт тавьж, үнэт зүйл, зорилго нэгтэй байгууллага, хувь хүмүүстэй хамтран ажиллахад анхаарах болно. 

Үүсгэн байгуулагч, Гүйцэтгэх захирал

Жаахан сурагч Цогзолмаа “Ээж минь” хэмээх богино өгүүлэл бичсэнээ 5-р ангийн төгсөлтийн баяраараа уншиж байв. Цугласан олон нулимс дуслуулан сонсож, ээж минь ч сэтгэл догдлон мэлмэрснийг А үсэг заасан эрдэмт багш маань хэлээд, сэтгүүлч болох хүн байна гэж намайг урамшуулж, тодорхойлсон. Нээрээ л тэр цагаас хойш зохиосон шүлэг, өгүүллээрээ дүүргийн болон улсын эх бичвэрийн уралдаан тэмцээнд байр эзэлсээр, өнөөдрийн сэтгүүлч Ж.Цогзолмааг бүтээжээ. 

Би 2004 онд КУДСургуулийг сэтгүүлч орчуулагч мэргэжлээр төгссөн. Ажлын гараагаа “Улаанбаатар таймс” сониноос эхэлж, улмаар үндэсний өдөр тутмын ууган хэвлэл “Зууны мэдээ” сонинд Эдийн засгийн мэдээллийн албаны даргаар 10 жил ажилласан туршлагатай. Эдийн засаг хэмээх амаргүй сэдвийг айл өрхийн гал тогоо, автобус унааны төлбөр, хөгшин, залуу хэн бүхний халаастай холбож, бүр цаашлаад олон улсын зах зээлтэй нэгтгэн бичдэг байв. Дотоодын асуудлыг бусад орны алдсан, оносон түүх, сургамжтай жишиж, уншигчдадаа шинэ мэдээллийг насан туршид нь хэрэг болох мэдлэгтэйгээр хүргэж чаддагаараа ялгарч байлаа. 

Сэтгүүлчийн карьераас гадна гурван сайхан хүүгийн ээж. Энэ хугацаанд мөн програм хангамжийн чиглэлээр гэр бүлийн компанийнхаа Ерөнхий менежерээр, мөн эмэгтэйчүүд, хүүхдийн эрхийг хамгаалах “Монголжингоо медиа” ХХК-ийн mongoljingoo.mn вэб сайтын ерөнхий эрхлэгчээр ажиллаж байв. 

Хуримтлуулсан туршлагаа Room24.mn сайтын үйл ажиллагаа эрхэлсэн захирлын хувьд зориулах болсондоо баяртай байна. Мөн санхүү, эдийн засгийн асуудлууд эмэгтэйчүүдэд хэрхэн нөлөөлөхөд гүнзгий анализ хийж, энэ салбарт цойлж буй хүчирхэг эмэгтэйчүүдийн талаарх цуврал бүтээлийг сэтгүүлчийн хувьд хэрэглэгчдэдээ хүргэх болно. 

Үүсгэн байгуулагч, Бүтээлч захирал

Бүүр эхнээсээ миний дотор өөрчлөгч, бүтээгч, хайрлагч охин тэнгэрийн хүч байсныг одоо улам тод харж байна. Би сэтгүүлч, утга зохиол судлаач мэргэжилтэй. "Өнөөдөр" сонин, ТВ5 телевизээс ажлын гараагаа эхлэхдээ л хүүхэд, эмэгтэйчүүдийн сэдэвт татагдан нийгмийн асуудал хөндсөн цуврал нийтлэл, нэвтрүүлгээрээ асч явжээ. Дан ганц сэтгүүлчийн үзгээр энэ бүхний шийдлийг зурахгүй юм байна гэдгийг тэгэхэд мэдэрч, өөрийн оролцоогоор өөрчлөн шинэчлэх хүслийн намтраа эхлүүлсэн түүх бий. 

Сумын анхан шатны улс төрийн удирдах ажлаас аймгийн хэлтсийн дарга, цаашлаад үндэсний хэмжээний үйл ажиллагаанд дэвшин ажиллахдаа эмэгтэй дүрээр улс төр, нийгмийн идэвхи гаргах нь махны машинд орохтой ижил хахир болохыг зүрх сэтгэлээрээ туулсан. Тиймээс ч "Улс төр дэх эмэгтэйчүүдийн манлайлалд тулгамдаж буй асуудал юу байна, яаж шийдвэрлэх вэ" гэсэн асуултын хариултыг эрж, энэ сэдвээрээ төрийн удирдлагын магистрт суралцаж, судалгаа хийв. Судалгааны явцад төрсөн санаанууд маань хүүхдийн зохиол болон цэцэглэж, олон мянган охины зүрхэнд яргуй болон ургах "Ач тусын тухай үлгэрүүд" цуврал номоо өлгийдөн авсан билээ.

Одоо бол би сэтгүүлч, хүүхдийн зохиолч, ЭЭЖ. Байгалийн хуульд нэгдэн бясалгагч. Амьдралын тэнцвэр, орчин үеийн хүний эзэмшвэл зохих эрүүл амьдралын хэв маягийг судалж, олны хүртээл болгоход сэтгэл зүрхээ зориулан ажиллаж ирсэн. Ингээд бодоход амьдралын минь алхам бүр намайг Room24 лүү хөтөлжээ. Цаашид энэ орон зайдаа гэрэл болон асаж, бичин нийтэлж, эмэгтэйчүүдийнхээ зорьж ирээд тухлан хөгжих сэтгэлийн өргөө болгохыг зорьж байна. Үүнтэй зэрэгцэн, өөрийгөө энэрэх, өөрийгөө үнэлэн өнгөлөх итгэлийн титмийг эмэгтэй бүрийн тэргүүнд залах контент, зөвлөх үйлчилгээг хариуцан хөтлөх болно. 

Үүсгэн байгуулагч, Ерөнхий эрхлэгч

Тавдугаар ангийн сурагч байхад монгол хэл, уран зохиолын багш маань “Чи сэтгүүлч болно оо” гэсэн нь миний ажил мэргэжлийн сонголт, хүсэл тэмүүлэл, амьдрах зам мөр, хийж бүтээх орон зай болжээ.  Тэр цагаас өнөөг хүртэл олон салаа зам бүрд ухамсартай, ухамсаргүйгээр сонгосоор ирсэн зүйл маань сэтгүүл зүй байв.

ОХУ-ын Ивановын Улсын их сургуулийг сэтгүүлч мэргэжлээр төгсөж, Бээжингийн багшийн их сургуульд боловсрол судлалаар магистрын зэрэг хамгаалж, сэтгүүл зүй, орчуулгын чиглэлээр өдөр тутмын сонин, урлаг гоо зүйн сэтгүүл, мэдээллийн сайт зэрэг байгууллагад 17 жил, олон нийттэй харилцах чиглэлд дөрвөн жил ажилласан.

Оюутан ахуйгаасаа хувцас загвар, урлаг, түүх өгүүлэхүй, амьдралын хэв маяг, феминизм зэрэг сэдвийг сонирхож, эмэгтэйчүүдийн сэтгүүлийг шимтэн уншиж, бакалаврын дипломын сэдвээ ч энэ чиглэлээр сонгож байв. Эл сонирхол, тэмүүлэл маань Room24 хэмээх орон зайд хөтлөн авчирч, өөдлөн дэвжих талбарыг хамтдаа бүтээх эхийг тавилаа. Хэвлэл мэдээлэл, тэр дундаа эмэгтэйчүүдэд зориулсан агуулгыг анхлан таниулсан “Cosmopolitan” шиг, дэврүүн мөрөөдөл дүүрэн өдрүүдийг минь  бүтээлцсэн “Гоодаль” сэтгүүл шиг, туулах урт замд хань, асуух олон асуултад найз байх талбарыг хамтдаа босгож ажиллана.

Үүсгэн байгуулагч, Ерөнхий стратегич

Би өөрийгөө феминист хэмээн тодорхойлдог. Миний гурван охин, Монголын бүх охид хөвгүүд илүү сайхан, эрх тэгш нийгэмд амьдраасай гэсэн хүсэл тэмүүлэлтэйгээр сурч, сэтгэж, хөдөлмөрлөсөөр өдий хүрлээ. 

“Өнөөдөр” сонины сэтгүүлчээр ажлын гараагаа эхэлж, олон улсын “Reuters” агентлагийн Монгол дахь сурвалжлагч, АНУ-ын “Global Press Institute”-ийн сургагч багш, зөвлөхөөр ажиллаж байв. 2016-2017 онд НҮБ-ын Хүн амын сангийн дэмжлэгтэйгээр Жендэрт суурилсан хүчирхийллийг ёс зүйтэй мэдээлэх нь сэдэвт сургалтын хөтөлбөр боловсруулж, хэвлэл мэдээллийн кампанит ажил өрнүүлэн Гэр бүлийн хүчирхийлэлтэй тэмцэх тухай хуулийг батлуулахад хувь нэмэр оруулж байлаа. Энэ туршлага маань охид, эмэгтэйчүүдийн эрхийг хамгаалах чиглэлээр ажилладаг коммюнитигийн хаалгыг нээж өгчээ.

Жендэрийн мэдрэмжтэй сэтгүүл зүйг хөгжүүлэх чиглэлээр Монгол Улсад анхдагч судалгаануудыг хийж, сургалтын хөтөлбөр боловсруулж, олон зуун сэтгүүлч, олон арван хэвлэл мэдээллийн байгууллагатай хамтран ажилласан туршлагатай. 

2008 онд ОХУ-ын Ивановын Улсын их сургуулийг сэтгүүлч мэргэжлээр төгсөж, 2019 онд Латви дахь Стокхолмын эдийн засгийн сургуульд Медиа Менежментээр мэргэжил дээшлүүлж, 2024 онд Чевнингийн тэтгэлгээр Их Британийн Сассексийн их сургуульд Жендэр ба Медиа судлаачаар магистрын зэрэг хамгаалсан. Сурсан мэдсэнээ бусадтай хуваалцах нь миний хамгийн дуртай ажил учраас сэтгүүлчээс сургагч багш, зөвлөх, ментор болон туршлага хуримтлуулжээ.

Рүүм Медиа Консалтинг компанийн сургалт, зөвлөх үйлчилгээний хөтөлбөрийг боловсруулж, төгөлдөршүүлэхийн зэрэгцээ олон улсын харилцаа холбоог бэхжүүлж, Room24 бизнес загварыг Монголд төдийгүй бусад улсад нутагшуулах зорилго тавин ажиллаж байна. Үүний зэрэгцээ феминизмийн талаарх буруу ойлголтыг залруулах, эмэгтэйчүүдийн өмнө тулгамдаж буй асуудлуудыг шийдвэрлэхийн төлөө сэтгүүл зүйн бүтээлүүдээ ч тогтмол гаргах болно.