Хүний эрхийн активист, ОУХ-ны эдийн засагч Г.Дэлгэрмаа
Монгол Улс эмэгтэй Ерөнхий сайдтай болох ёстой гэж үзэх хэд хэдэн чухал үндэслэл бий. Энэ нь зүгээр нэг “тэнцвэрийн төлөөх алхам” бус, нийгмийн хөгжил, засаглалын соёл, бодлогын чанар зэрэг олон талт асуудлыг шийдвэрлэхэд шууд нөлөөлөх стратегийн чухал өөрчлөлт юм.
- Төлөөллийн шударга байдал. Монголын хүн амын 50 гаруй хувийг эмэгтэйчүүд бүрдүүлдэг ч төрийн бодлогын шийдвэр гаргах дээд түвшинд (УИХ, Засгийн газар) эмэгтэйчүүдийн оролцоо хэт бага хэвээр байна. Эмэгтэй Ерөнхий сайдтай болох нь энэ тэнцвэргүй байдлыг задлан нээж, бодит төлөөллийг бий болгох чухал алхам болно.
- Өөр бодол, өөр хандлага. Эмэгтэйчүүдийн манлайлал эмпатитай, нийгмийн сайн сайхныг илүү анхаардаг, урт хугацааны тогтвортой бодлогод чиглэсэн байдаг нь олон улсын судалгаагаар нотлогдсон. Хүчээр биш, хамтын ажиллагаанд суурилсан удирдах чадвар өнөөгийн гүн хямралд ороод буй Монголын улс төрд шинэ соёл авчирна.
- Нийгмийн мэдрэмжтэй удирдлага. Халамж, боловсрол, эрүүл мэнд, гэр бүлийн хүчирхийлэл, хүүхдийн эрх зэрэг “зөөлөн” салбар бодлогын гадна үлдэх хандлага давамгайлсаар байна. Эдгээр асуудалд хувийн туршлага, амьдралын мэдрэмжтэй ханддаг удирдагч хэрэгтэй.
- Олон улсын жишиг. Финланд, Эстони, Шинэ Зеланд, Молдав, Итали зэрэг орны эмэгтэй Ерөнхий сайд улс орноо тогтвортой, ил тод, шударга удирдаж чадсан нь туршлага бий. Монгол Улс ардчиллын 30 гаруй жилийн турш зөвхөн эрчүүдээр удирдуулсан бөгөөд энэ хугацаанд системийн хямрал, авлига, ялзрал арилаагүй. Өөр арга, өөр хандлага хэрэгтэй гэдгийг түүх харуулж байгаа юм.
- Үзэл суртлаас бодит үр дүнд шилжих цаг. “Эмэгтэй хүн удирдаж чадахгүй” гэх хоцрогдсон хэвшмэл ойлголт Монголын дэвшилд саад болж байна. Чадвар, зарчим, ёс зүй, харилцаа, хариуцлага зэрэг нь хүйсээс хамаарахгүй. Харин ч эмэгтэйчүүд нийгмийн хатуу орчинд өөрийгөө батлан харуулсаар ирсэн туршлагатай.
Тиймээс эмэгтэй Ерөнхий сайд гэдэг бол зүгээр нэг “эмэгтэй хүн байх ёстой” гэсэн шаардлага биш, харин төрд шинэ хандлага, шинэ эрч хүч, илүү тэнцвэртэй, шударга, хариуцлагатай удирдлага авчрах БОЛОМЖ юм.
